Kateqoriya: Media

“Yaradıcı insanlar kommersiyanı güdməməlidir” – Mədəniyyətimiz tənqid, yoxsa təqdirəlayiqdir? (ŞƏRH)

“Tamaşaları elə qururlar ki, aksentlər başqa istiqamətə yönəlir”

Yumor insanın reallığa münasibətinin göstəricilərindən biridir. Bunun hesabına insanlar öz narazılıqlarını güclü formada çatdırır, qınayır və çatışmazlıqları bildirirlər.

Əvvəllər televiziya ekranlarından səslənən yumorla müqayisədə indikilər çox primitiv görünür. Bu səbəbdən Azərbaycan səhnəsində yumorun səviyyəsinin aşağı düşməsi ilə bağlı narazılıqlar artıb.

Çəkilən bəzi serialların Azərbaycan xalqının milli-mənəvi dəyərlərinə uyğun olmayan, yalnız ucuz gülüş xətrinə müəyyən məsələlərin əks olunduğu düşünülür.

Ötən gün Akademik Rus Dram Teatrının aktyoru Rüfət Nəzərin sosial şəbəkə hesabı vasitəsilə bu sahəni sərt tənqid etməsi mövzunu bir daha gündəmə gətirib:

“Milli satiramızın cütlükləri, qadınlar və seksual azlıqlardan savayı parodiya ideyasından başqa heç nə yoxdur? Yumorumuzun səviyyəsi budur?”

Tahir İmanov: “Düşünürəm ki, bu cür söz-söhbətlər keçən əsrdə qalmalıdır. Hər kəs sənətkarın yalnız sənətindən danışmalıdır”.

Bu barədə Mediapost.az-a danışan “Planet Parni iz Baku” KVN teatrının bədii rəhbəri, rejissor və aktyor Tahir İmanov bildirib ki, belə mövzular sənətkarların arasını vurur:

“Bu cür söz-söhbətlərə vaxt ayırmağı düzgün hesab etmirəm. Çünki bunlar yalnız sənətkarların arasını vurur və çox böyük ixtilaflar yaradır. İnsanlar bu sahədə nəyisə tənqid edə bilər, mən onların da fikrinə hörmət edirəm. Artıq cənab prezident də bildirdi ki, hər bir sahədə mütləq inkişaf olmalıdır. Düşünürəm ki, bu cür söz-söhbətlər keçən əsrdə qalmalıdır. Ölkə başçısının da dediyi kimi hər birimiz yalnız irəlini düşünməli, inkişaf etməyə çalışmalıyıq. Hər kəs sənətkarın yalnız sənətindən danışmalıdır.”

Məsələ ilə bağlı ictimai xadim və aktrisa Zəhra Bədəlbəyli də Mediapost.az-a açıqlama verib:

“Azərbaycanda istedadlı aktyorlar, aktrisalar, rejissorlar var. Amma teatr sahəsində boşluqlar çoxdur. Struktur olaraq bir az geridə qalmışıq. Teatrlarda böyük bir irəliləyiş olmalıdır. Ümid edirəm ki, yaxın zamanlarda bu, baş tutacaq. Komediya janrında əvvəlki səviyyə itirilib, yerinə isə yeni üslub gəlib. Bu məsələyə təəssüf hissi ilə yanaşıram”.

Zəhra Bədəlbəyli: “Yaradıcı insanlar kommersiyanı güdməməli, daha çox səviyyəni qaldırmağa xidmət etməlidirlər”.

Mütəxəssis qeyd edib ki, ssenaristlər, rejissorlar tamaşaçılara qeyri-intellektual yumorun daha maraqlı olduğunu düşünür:

“Ona görə də tamaşalar bu istiqamətdə hazırlanır, filmlər belə çəkilir. Tamaşaları elə qururlar ki, aksentlər başqa istiqamətə yönəlir. Bundan başqa, kişilər qadın paltarları geyinərkən çox aşağı səviyyəli insanları göstərirlər”.

Z.Bədəlbəyli bildirib ki, əvvəllər bütün dünyada qadın rollarını kişilər ifa edirdi və yüksək səviyyədə tamaşaçılara təqdim olunurdu: “İndi isə sadəcə diqqət cəlb etmək istəyirlər. Demirəm ki, kişilər qadın, qadınlar kişi rolu oynamamalıdır. Yaradıcılıq sərhədləri, çərçivələri sevmir. Amma bu, mütləq peşəkarcasına göstərilməli, tamaşaçıların zövqünü tərbiyə etməlidir. Yaradıcılıq inkişafa işləməlidir.Bizdə isə bu məsələlər əksinə baş tutur. Çünki ortada kommersiya maraqları var. Düşünürəm ki, yaradıcı insanlar bunu güdməməli, daha çox səviyyəni qaldırmağa xidmət etməlidirlər”.

“Erməni yumor ustalarına gəldikdə isə yəqin “Comedy club” nəzərdə tutulur. Bilirsiniz, bizim “Planet Parni iz Baku” komandamız çox yüksək səviyyəli aktyorlardan ibarətdir. Deyə bilmərəm ki, ermənilər daha peşəkar, daha irəlidədir. Sadəcə, lobbiləri həmişəki kimi onları qabağa çəkir. “Comedy club”da yer alan aktyorların Ermənistanda yetişdiyinə də inanmıram. Onlar elə aktyorluq məktəbini Moskvada keçiblər, orada püxtələşiblər” – ictimai xadim sonda əlavə edib.

Digər mənbə: musavat.com, medianews.az

Ölkədə keçirilən festivallar turizmin inkişafına təsir edirmi? – AÇIQLAMA

Son illər bir sıra beynəlxalq tədbirlərə ev sahibliyi edən Azərbaycanda həm də lokal səviyyəli, daha çox daxili bazara hesablanmış festivallar, sərgilər və maraqlı tədbirlər keçirilir.

Nar, xurma, alma, üzüm, xalça festivalları ilə yanaşı “Caz festivalı”, “Qəbələ musiqi festivalı”, “Muğam Dünyası” Beynəlxalq musiqi festivalı, “Bakı-Avropa şəhərciyi” festivalı kimi tədbirlərin ilbəil ölkədə keçirilməsi gözəl ənənəyə çevrilib.

Avqustun sonuncu həftəsində Azərbaycan Avtomobil Federasiyasının təşkilatçılığı ilə Bakıda artıq neçə ildir reallaşan klassik avtomobillərin yürüşü və sərgisi də keçirilib. Tədbirdə 1980-ci ilədək istehsal olunmuş klassik avtomobillər iştirak edib. Yürüşlə paralel olaraq “retro vintage” üslubunda geyim müsabiqəsi də təşkil olunub.

Yarışmada ikinci yerə layiq görünən aktrisa və incəsənət xadimi Zəhra Bədəlbəyli məsələ ilə bağlı “Report“a açıqlamasında bildirib ki, libasını müsabiqədə iştirak üçün seçməyib:

“Məncə, bu bir bayramdır. Dərin mənası var ya yox deyə bilmərəm. Şəxsən mənə bu avtomobilləri görmək, onlar haqqında məlumat almaq çox maraqlıdır. Bu, bir növ tariximizə nəzər salmaqdır, çünki maşınların çoxunun öz qeyri-adi tarixçəsi var.

Geyim yarışması mənim üçün başqa bir fürsət idi. Çox sevdiyim retro üslubunda geyinmişdim. Adi tədbirlərə belə geyimdə getmək mümkün olmur, amma burada tam uyğun görünürdü. Amma bu geyimimi də müsabiqədə iştirak üçün istifadə etməmişdim. Ötən illərdə müsabiqə olmurdu, amma mən yenə də bu üslubda geyinməyə çalışırdım.

Bu il isə XX əsrin 40-cı illərinə uyğun geyinməyə cəhd etdim. Daha doğrusu, çox sevdiyim “Perl Harbor” filmi məni ilhamlandırdı. Müsabiqədə ikinci yer tutmağım isə məni həm sevindirdi, həm də hədiyyə aldım. Ona görə də həm təşkilatçılara, həm də münsiflər heyətinə çox minnətdaram. Çox istərdim bu retro-yürüş illərlə ənənəvi olaraq baş tutsun”.

Bəs belə tədbirlər ölkəyə nə verir? Turizmin inkişafına nə qədər kömək edir?

Dövlət Turizm Agentliyinin mətbuat xidmətinin rəhbəri Kənan Quluzadənin fikrincə, keçirilən festivalların hər birinin turist cəlbetmə potensialı var:

“Dövlət Turizm Agentliyi olaraq bizə müraciət olunduğu zaman bir çox festivallara dəstək oluruq. İndi əsas məsələ həmin festivalların turizm məhsuluna çevrilməsidir. Bu festivallar ənənəvi xarakter daşısalar, hər il eyni zamanda keçirilsələr, onlar turizm təqviminə otura bilərlər. Yerli və xarici turistlər müəyyən edə bilərlər ki, hansı ayda, hansı bölgədə, hansı festival var. Bunların hamısının turist cəlbetmə potensialı var.

Dövlət Turizm Agentliyinin mətbuat xidmətinin rəhbəri Kənan Quluzadə

“Yerli və xarici turistlər müəyyən edə bilərlər ki, hansı ayda, hansı bölgədə, hansı festival var. Bunların hamısının turist cəlbetmə potensialı var”.

Hər bir festivalın öz təşkilatçısı var. Dövlət Turizm Agentliyi bir ildir yaradılıb. Biz əməkdaşlıq etdiyimiz, dəstək olduğumuz festivallara turizm cəlb etməklə bağlıüsulları göstəririk. Festivalı turizm məhsuluna çevirməklə bağlı məlumat veririk. Festival əslində keçirilən regionun həm tanıdılmasıdır, həm təbliğatıdır, həm də ki regiona gəlir gətirə biləcək bir hadisədir. Biz çalışırıq ki, təşkilatçılara bu festivalların məhz turizm məhsuluna çevrilməsinin yollarını göstərək”.

Kənan Quluzadə bildirib ki, növbəti il festivalların turizmin inkişafına hansı dərəcədə töhfə verdiyi daha aydın olacaq:

“Biz bu il bir neçə festivala dəstək olmuşuq. Gələn il bu festivalların bəhrəsini görəcəyik. Onlar, bizim xaricdə və daxildə apardığımız turizm təbliğatının bir hissəsinə çevriləcək. Artımla bağlı gələn il detalları daha ətraflı göstərə biləcəyik. İndinin özündə də festivallara maraq böyükdür. Amma bu marağın ilkin mərhələsidir”.

Virtual oyun həvəsi: mədəniyyəti üstələyən sosial bəla ya gəlir gətirən peşə?

Rəqəmsal texnologiyalar günümüzü, demək olar, zəbt edib. Gənclər hər hansı bir teatr tamaşasına getməkdənsə, daha çox “pleysteyşn” salonlarında zaman sərf etməyi, kompüter və smartfonlarda oyun oynamağı seçirlər. Oyun asılılığı müasir dövrün ən ciddi probleminə çevrilib. Gənclər imkan düşən kimi ya oyun oynayır, ya da bayağı musiqi dinləyirlər. Klassik musiqi də dəbdə deyil.

Anews.az problemi araşdırıb.

İncəsənət xadimi, aktrisa, pianoçu Zəhra Bədəlbəylinin fikrincə, ölkəmizdə mədəni tədbirlər heç də az keçirilmir: “Hətta ağır dövrlərdə belə insanlarımız mədəniyyəti qoruyub-saxlamağa cəhd edib. İndi isə günü-gündən artan tədbirlərə gənclərdə də maraq artır.
Amma bununla yanaşı rəqəmsal cihazlardan ayrılmayanlar da var. Fikrimcə, bu məsələyə həm orta məktəb, həm də televiziya vasitəsilə təsir etmək olar.

Əgər cihazları uşaqların əlindən götürmək çətindirsə, onda həmin cihazların vasitəsilə maraqlı və faydalı informasiyanı ötürmək lazımdır. Məhz bu cür ideyaların reallaşmasına çalışmalıyıq”.

Aktrisa bildirib ki, mədəniyyətə maraq məktəbdə və ailədə yaranmalıdır: “Bu işdə televiziya və radionun çox böyük rolu var. Əslində, mədəni olmağı dəbə salmaq lazımdır. Mənim “Mədəni Ol” layihəm məhz bunun üçün düşünülüb. Biz indi bu

vəziyyətə təsir etməsək, oyundan asılı gələcək nəsil mədəniyyət anlayışını heç bilməyəcək. Layihəmin adı kobud səslənə bilər, amma insanları fikirləşməyə vadar etməliyik, çünki mədəniyyət cəmiyyətin əsas təməlidir”.

Sosioloq Əhməd Qəşəmoğlu virtual oyunlardan asılılığı sosial bəla adlandırıb:

“Virtual oyunlardan asılılığın yaranması çox qorxunc bir haldır. Buna sosial bəla deməyimiz çox doğru olar. Bu asılılıq insanlara hər tərəfdən zərbə vurur. Hər bir insanın inkişafında ən mühüm olan onun fiziki sağlamlığı, mənəvi zənginliyi və əməyə yaradıcı münasibət tələbatının artmasıdır. Bunlar olduqda insanın, cəmiyyətin həyatı ahəngdar, normal olur.

Bəs virtual oyunlardan asılılıq nə edir? Həmin gənclər bəzən səhər saatlarına kimi bu oyunların aludəçisi olurlar. Bu zaman ilk olaraq fiziki sağlamlığa böyük zərbə dəyir, insan öz fiziki sağlamlığını itirir, yeniyetmələrin, gənclərin əsəbi pozulur. 

Həyatın əsas şərtlərindən biri mənəvi zənginlikdirsə, həmin virtual proseslərə başı qarışan insanlar öz dərslərini unudur, ancaq oyunla məşğul olurlar. Onların içində əxlaqa zidd, kriminal aləmə aid, xoşagəlməz məlumat az deyil. İnsan bu virtual asılılıq hesabına mənəviyyata, əxlaqa zidd olan mühitə düşür və o mühitdə formalaşır. Onlar mənəvi cəhətdən böyük zərbə alırlar.

Virtual oyundan asılı olan adam həm də öz karyerasını qura bilmir. Həmin vaxtda bu adamlar yaxşı tələbə, idmançı, işçi ola bilərdi. Bu da daha bir zərbədir. 
Üçüncü vacib məsələ isə hər bir insanda əməyə yaradıcılıq tələbatının olmasıdır. Virtual asılılıq olan adamda isə öz əməyinə yaradıcılıq tələbatı olmur. İşinə qarşı səhlənkar münasibət yaranır. Yəni insan artıq diqqətini əməyə yönəldə bilmir.  
Virtual asılılıq bu 3 şərtin hər birinə zərbə vurur. Bunlar insanı məhv edir. Bilmək lazımdır ki, kompüter, sosial şəbəkələr vacib vasitələrdir. Amma onları öz təyinatına görə istifadə edəndə gözəldir. Virtual asılılıq zamanı isə bunlar qorxuludur. 

Dəfələrlə demişəm ki, internet bir ilan zəhəri kimidir. Düzgün istifadə edəndə çox qiymətli dərman, artıq olanda zərərvericidir. Ona görə biz çalışmalıyıq ki, hər yerdə bu məsələlərlə bağlı maarifləndirmə işləri aparılsın və əhalidə internetdən istifadə etmə mədəniyyəti formalaşsın. Təəssüf ki, bu gün o mədəniyyət yoxdur. Bu mədəniyyətin olmaması ümumi mədəniyyətimizə və yeni nəslin keyfiyyətinə böyük zərbədir”.

Virtual oyun həvəskarı Kamran Əhmədli bildirib ki, oyun oynamaq onu digər işlərindən ayırmır:

“Virtual oyunlarla 4 və ya 5 yaşımdan məşğul oluram. Məktəbdə oxuyan zaman bu oyunlara gündə 7 saata yaxın vaxtım gedirdi. İndi isə 1-2 saat məşğul oluram. Oyun oynamaq məni heç bir halda başqa işlərdən ayırmır. Hər bir işimi planlı olaraq vaxtında edirəm.

Bu, mənim üçün hobbidir. Oyun oynamağa heç vaxt bir iş, peşə kimi yanaşmamışam. Təbii ki, bu işə ciddi yanaşanlar da var. “Geymer”lər bütün dünyada fəaliyyət göstərir. Məncə, onları bir ölkə ilə limitləmək olmaz. Çünki “pro-geymer”lər çempionatları fərqli-fərqli ölkələrdə keçirir, daim bir ölkədə yaşamırlar. Ona görə də “geymer”in hansı ölkədə daha yaxşı gəlir əldə edə bilmək məsələsi aktual deyil”.

Virtual oyunları asılılıq hesab etməyən geymer vacib işi olduğu zaman oyun oynamağa ehtiyac duymadığını söyləyib: “Mənə görə oyun asılılıq deyil. Çünki istəmədiyim və ya hansısa daha vacib işim olduğu zaman oyun oynamağa ehtiyac duymuram. Sadəcə boş vaxtlarımda virtual oyunlardan istifadə edirəm. Məncə, dostlarla hər hansı çayxanada, kafedə oturmaqdansa, bir yerdə kompüter oyunu oynamaq daha maraqlı vaxt keçirməkdir”.

Mənbə: anews.az

İşgüzar qadın bizneslə şəxsi həyat arasında harmoniyaya necə nail olmalıdır?

Azərbaycanda işgüzar qadınların sayı artmaqdadır. Sürətli inkişaf dövrünün tələbləri qadını pul qazanmağa, ailəni maddi baxımdan təmin etməyə və bizneslə məşğul olmağa sövq edir.

Ölkənin biznes idarəetməsindəki xanımlar getdikcə fəaliyyət dairəsini genişləndirərək dünya səviyyəsinə çıxır, beynəlxalq platformalarda söz sahibi olduqlarını nümayiş etdirir, fərdi sahibkarlığın bir çox sahələrində özlərini uğurla sınaqdan keçirirlər.

Bəs Azərbaycan  xanımı biznes, şəxsi həyat, ailə arasındakı harmoniyanı necə tənzimləyir?

Hər iki övladı ölkə xaricində təhsil alan, Azərbaycanda tanınmış gözəllik salonu şəbəkəsinin yaradıcısı Elnarə Nəhmədova bildirir ki, seçdiyi həyat tərzi çox çətindir:

“Hazırda övladlarımın elə yaşıdır ki, yanlarında onlara dəstək verən anaya ehtiyacları var. Nə qədər çətin olsa da, bunun öhdəsindən gəlməyə çalışıram. Amma seçimimə görə peşman deyiləm.

Mənə görə, hər bir qadın dünyaya gələndə artıq təbiət ona bu məsuliyyət hissini bağışlayır. Bizim ölkədə qadın bacardığı qədər məsuliyyət daşımağa öyrəşib. Lakin işin məsuliyyəti təəssüf ki, şəxsi həyatıma maneə törədir. Çünki ailəmdən çox işimə və işçilərimə vaxt ayırmalı oluram. Bu da heç asan deyil.

“Beauttech” artıq adi salon deyil. Bu, bir sistem üstündə qurulan şirkətdir və daim inkişaf edir. İndiki zamanda ən üstün hədəfim onlayn və rəqəmsal idarəetmə sisteminin mükəmməlləşməsidr. Bunu da addım-addım, uğurla həyata keçirirəm.

Özümə də mütləq vaxt ayırmalıyam. İlk olaraq qadın olduğuma görə. Həm də bir gözəllik mərkəzinin simasıyam”.

Tanınmış aktrisa, pianoçu və yazıçı Zəhra Bədəlbəylinin fikrincə, şəxsi həyatla iş arasında harmoniyanı əldə etmək çox asandır:

“Sadəcə həyatın bütün məqamlarına və ətrafında olan hər bir insana sevgi və hörmət ilə yanaşmaq kifayətdir.  Onda nə iş, nə də başqa məsələlər şəxsi həyata təsir etmir.

İşi də mütləq sevmək lazımdır. Yoxsa o iş sadəcə sizin vaxtınızı alıb o zamanda sizi girov götürərək həyatdan çıxaracaq. Bu vaxt günün çox zamanını aparırsa, deməli siz günün böyük hissəsini sevgisiz yaşayırsınız, hətta deyərdim yaşamırsınız.

Mən hər bir işlədiyim sferadan zövq alıram. Hobbilərimi soruşanda çəkinmədən cavab verə bilirəm ki, bütün hobbilərim işə çevrilir və bütün işlərimi hobbi kimi sevirəm. Amma çətinliyim də az olmur. Adətən sutkada olan 24 saat mənə bəs eləmir. Buna görə illərlə özümdə vaxta qənaət və cədvəl qurmaq hissini tərbiyə etmişəm”.

Zəhra Bədəlbəyli vurğulayır ki, özünü incəsənətə həsr etməyinin heç bir mənfi tərəfi yoxdur: “Mənim bütün həyatım onunla bağlıdır. Həyatımda baş verən bütün hadisələr incəsənət ətrafında fırlanır. Bütün insanlar kimi incəsənət insanların da dostları olur, ailələri, tanışları  olur.

Əlbəttə hansısa tədbir zamanı, ona yaxın bütün ətrafda olan insanlara diqqət ayırmaq olmur. Amma gündəlik həyatımda demək olar ki, heç bir münasibətə təsir etmir. Təbii ki, mənə ən yaxın insanlar daha çox incəsənəti bilən və ya incəsənətə yaxın insanlardır”.

“ALZA” butiklərinin və “Wowoman” qadın platformasının təsisçisi, “Forbes” jurnalının 30 yaşdan aşağı “30 avropalı sosial sahibkar” siyahısında yer alan Zara Hüseynova qeyd edib ki, ailə qurmağı iş həyatına yalnız pozitiv təsir edib:

“Yoldaşım hər zaman mənə atamdan daha çox azadlıq verib. Ona görə də yanımızda olan insanları düzgün seçməliyik. Çünki onlar bizi ya qabağa aparır, ya da geri çəkirlər.

İş qadınları heç nədən imtina etməli deyil. Dediyim kimi, sadəcə seçim düzgün olmaldıır. Belə olanda həyatdan birlikdə zövq almaq, birlikdə böyümək mümkündür. Sahibkarlar 7 gün, 24 saat işləyir. Heç kim düşünməsin ki, biznes qurulandan sonra iş həyatı daha rahat olur. Əksinə gedib yatanda da problemlərin həllini axtarırsan. Bu seçimindən zövq alırsansa, imtinaya məhkum deyilsən. Amma olduqca çətindir.

Biznesi qurmaq çətindir, gənc qadın olaraq lap çətin idi. 8 il bundan əvvəl “Wowoman”ı yaratdıq. Hələ də problem var, amma getdikcə hər şey yaxşılığa doğru dəyişir. Mən öz arzularımın dalınca gedirdim. Amma ətrafımda olan bir çox qızlar öz seçimlərini etmirdilər. Mən də özümü tək hiss edirdim. Elə bir platforma yaratmaq istəyirdim ki, orada qızlar, qadınlar öz arzularının arxasınca gedə bilsinlər. Bilikləri, motivasiyaları, dəstəkləri olsun. Başa düşürdüm ki, dəstək sistemi çox vacibdir. Elə bir sistem yaradırıq ki, hər bir qadından ondan istifadə edib qabağa gedə bilər”.

Zara Hüseynova çoxuşaqlı qadınların iş həyatından da söz açıb: “3-4 uşaqlı bir qadın biznes qura bilərmi? Bu haqda təcrübəm olmadığı üçün tam cavab verə bilməyəcəyəm. Çoxuşaqlı qadın işləməyərək xoşbəxtdirsə, niyə məcbur eləməliyik ki, işləsin? Amma o uşaqları böyütmək üçün daimi olaraq oxumaq, trendləri bilmək lazımdır. Özünü inkişaf etdirməlisən ki, uşaqlara nümunə ola biləsən.

Geniş imkanlar hamıda var. Onları görmək üçün öz üzərində işləməli, özünə investisiya eləməlisən. Bunları istifadə etmək üçün isə cəsarətli olmalısan. Praktikanın da böyük əhəmiyyəti var. Nə qədər çox öz üzərində işləsən, imkanları bir o qədər çox görəcəksən.

Yenə də istəmirəm ki, hər şey çəhrayı dünya kimi görünsün. Doğrudan da çətindir. Amma o sizin dəyərlərinizdən, arzularınızdan, prioritetlərinizdən asılıdır. Nə qədər çox özünü tanısan, atanı, qonşularını, sosial şəbəkə dostlarını yox, özünü xoşbəxt edən şeyləri  bilsən, onda hər şey daha asan olacaq”.

Mənbə: marja.az

Şuşaya qayıdış necə olacaq?

Mayın 8-də Antenn FM radiosunun “Birinci şou” verilişinin efirində Şuşa mövzusunda dərdləşdik, 27 il öncə itirdiyimiz şəhəri xatırladıq.

“Şuşaya qayıdış necə olacaq” mövzunda mənim valideyn və qohumlarımın Şuşa xatirələrindən bir xeyli danışdıq.

Mən Şuşaya qayıdışı çox aydın görürəm. Ümidvaram, Şuşa məhz Azərbaycan şəhəri olaraq çox yaxın bir zamanda Qafqazın mədəniyyət paytaxtı adını özünə qaytara biləcək. İstərdim, Şuşanı itirdiyimiz 8 may 1992-ci ili yox, ora geri döndüyümüz ili və günü ilbəil qeyd edək. Amin!

ZƏHRA BƏDƏLBƏYLi FAVORiTLƏRiNi AÇIQLAYIB

Ölkəmizin Avroviziya mahnı müsabiqəsindəki ilk mahnısının söz yazarı və müsabiqə üzrə musiqi koordinatoru kimi çalışmış Zəhra Bədəlbəyli İctimai Televiziya yayımlanan “Eurovision Xəbərləri” verilişində İsrailin Təl-Əviv şəhərində baş tutacaq “Eurovision 2019” mahnı müsabiqəsində favoritlərini açıqlayıb.

Şairə, prodüser Zəhra Bədəlbəylinin proqnozuna görə müsabiqənin qalibi “Arcade” mahnısı ilə Hollandiya təmsilçisi Duncan Laurence olacaq.

İkinciliyi uğrunda isə İtaliya təmsilçisi Mahmood ilə Fransa təmsilçisi Bilal Hassani mübarizə aparacaq.

Müsabiqənin bürünc medalı isə keçən ilin gümüş medalının sahibi Kipr olacaq. Kipri gürcü ifaçı Tamta “Replay” adlı mahnı ilə təmsil edəcək.


Qeyd edək ki, Azərbaycan təmsilçisi Çingiz Mustafayev mayın 16-da “Eurovision 2019” mahnı müsabiqəsinin ikinci yarımfinalında 18-ci nömrə altında səhnəyə çıxacaq.

Mənbə: infeazerbaijan.org,  02.05.2019

İctimai TV-nin “Eurovision xəbərləri” verilişində

Zəhra Bədəlbəyli İctimai TV-də yayımlanan “Eurovision xəbərləri” verilişinin qonağı olub, Avroviziya 2019-da iştirak edən ölkələrdən 7-si barədə rəy bildirib.

Bu ölkələrdən Danimarka, Estoniya, Almaniya, İsrail, Finlandiya, Polşa və Monteneqro müzakirə olunub, Azərbaycanı təmsil edəcək Çingiz Mustafayevin çıxışına böyük ümidlər bəslənildiyi deyilib.

Zəhra Bədəlbəyli: İllərlə qazandığın ad-sanı bir saniyədə itirə bilərsən

Azərbaycan Yazıçılar Birliyinin (AYB) üzvü, şairə, prodüser Zəhra Bədəlbəylinin Oxu.Az-a (10 aprel 2019-cu il) müsahibəsi: 

– Zəhra Bədəlbəyli istedadlı pianoçu, bir çox tanınmış mahnıların sözlərinin müəllifi, bir neçə şeir kitabının yaradıcısı kimi tanınır. Amma son dövrlərdə özünüzü daha bir sahədə sınaqdan keçirirsiniz. Niyə aktrisa olmaq qərarına gəldiniz?

– Əslində, uşaqlıqdan səhnədəyəm. Aktrisa olmaq arzusu o zamandan içimdə olub. Ölkəmizdə isə həmin dövrdə kino, demək olar, çəkilmirdi.

Son illərdə həm dövlətin dəstəyi ilə, həm fərdi şəkildə çəkilən filmlər kinematoqrafiyanın inkişafından xəbər verir. Ssenarist və rejissorların inamı məni çox həvəsləndirdi.

Onlar məni filmlərə dəvət etməyə başlayanda isə özümdə aktyorluq bacarığını daha çox aşkarladım. Amma aktrisa olduğumu hələ təsdiqləməli olacağam. Çox işləməliyəm, öyrənməliyəm.

– Hansı filmlərə çəkilmisiniz? İşləriniz uğurlu alınır, yoxsa hansısa çətinliklə qarşılaşırsınız?

– Birinci qısametrajlı filmə 15 il əvvəl çəkilmişəm. Sonra isə tammetrajlı filmlərdə epizodik rollara dəvət aldım. Onların sırasında “Şər qarışanda”, “Ağ tük” filmləri yer alıb. Maraqlı rol “Siçan və Pişik” filmində olub, amma o, hələ Bakıda göstərilməyib. Nümayiş olunmasını çox istərdim, çünki kinomuzda yeni bir üslubdur.

Çətinliklə qarşılaşmıram. Ümumiyyətlə, bu sözü xoşlamıram. Sadəcə, həyatda bir mərhələdən o biri mərhələyə keçəndə öz üzərində çox işləmək, yeni informasiyaya açıq olmaq, təcrübəli peşəkarların sözünə qulaq asmaq lazımdır. Onda bütün çətinlikləri qısa zamanda aradan götürmək olur.

– Daha çox kinoda çəkilmək üçün dəvət alırsınız. Teatr səhnəsində çıxış etmək barədə düşünürsünüzmü? Deyirlər, teatr aktyoru olmaq xeyli çətindir.

– Bəli, mən də belə hesab edirəm. Bu formata uyğunlaşmaq çətindir. Aktyor və yaxud pianoçu illərlə topladığı ad-sanı bir saniyədə itirə bilər. Məsələn, səyahətlə bağlı problemlərə, həyəcana, zalın pis reaksiyasına görə və sair.

Bir də var zamansız incəsənət, onu biz hazırlayıb sonra tamaşaçıya təqdim edə bilirik. Bura kino, rəsm kimi janrlar aiddir, yəni sənətkar bir növ özünü sığortalaya bilir.

Ona görə də teatr kinodan çox fərqlidir. Amma mən bu sınağa özümü hazırlayıram. Artıq baş rol aldığım bir tamaşanın üzərində bir aydan artıq iş gedir. Çox maraqlıdır, tam yeni bir formatdır. Teatr tamaşasından əlavə bu bir yeni platforma olacaq və ümidvaram, bu platforma bizim teatrın inkişafına yardım edəcək.

– Bir müsahibənizdə Azərbaycan aktrisaları üçün münasib rolların olmadığını demisiniz. Yəni qadını müsbət baş qəhrəman edəcək ssenarilər yoxdur mənasında. Özünüz layiqli ssenari yaratmaq və baş rolda çəkilmək barədə düşünmüsünüzmü? Kinoda kimi canlandırmaq istərdiniz?

– Bəli, demişəm. Maraqlı ancaq müsbət demək deyil. Çox istərdim ki, dərin, mənalı obrazlar olsun. Ssenari yazmaq üçün də çox bilik əldə etməliyəm. Bu barədə düşünürəm. Ümumiyyətlə, aktyorluqdan başqa həm prodüser, həm də ssenari müəllifi kimi özümü sınamağa başlamışam.

Bu yaxınlarda “Sənin əllərində” adlı kitabımın qısametrajlı filmini dostlarımla çəkmişik. Onun ssenarisi mən və Mik Bluma, rejissor işi isə Orxan Fuladiyə aiddir. Prodüser işini də filmdə üzərimə götürmüşəm. Filmin festivallarda iştirakı nəzərdə tutulub.

Digər mənbələr: seherxeber.org ,  sonxeber.az ,  qaynarinfo.az , big.az , milletinsesi.info , milli.az , aznews.info